نگین لگتا ہوں میں دل نشین لگتا ہوں

نگین لگتا ہوں میں دل نشین لگتا ہوں
وہ دیکھ لے جو مجھے میں حسین لگتا ہوں
خرید لے وہ اگر کچھ کہیں بھی سستے میں
میں دل کی بستی میں بکتی زمین لگتا ہوں


وہ آب جو سی اگر رخ کرے مری جانب
میں پانیوں کے جہاں کا مکین لگتا ہوں
وہ روشنی جو مجھے روک لے کہیں تنہا
میں رات اوڑھ کے چندے جبین لگتا ہوں


وہ دیکھتے ہی مرا نام بول دے جو کہیں
میں اس کے لفظ سے اعلیٰ ترین لگتا ہوں
وہ مورنی سی مجھے جب ذہین کہتی ہے
میں اپنے آپ میں خود کو فطین لگتا ہوں