نئی زمینیں نئے آسماں بناؤں گا

نئی زمینیں نئے آسماں بناؤں گا
دریدہ عہد میں اپنا جہاں بناؤں گا
میں کھینچ کر ترے سورج کو اپنی دھرتی پر
حدود ثقل میں اپنا زماں بناؤں گا


درون دل میں لگاؤں گا تیری مورت کو
فصیل جسم پہ تیرا مکاں بناؤں گا
میں توڑ دوں گا سبھی بت ترے زمانے کے
شعور ذات سے ایسا سماں بناؤں گا


خطوط عشق سے میں جیت لوں گا دنیا کو
زمیں کی گود سے دل کی کماں بناؤں گا
میں روک دوں گا سبھی ظلم اس زمانے میں
سواد عدل کو ایسا رواں بناؤں گا