nam likhna hai to likhna mera diwanon mein

nam likhna hai to likhna mera diwanon mein
mere milne ka pata puchhna viranon mein
le gaya jazba-e-ulfat jo bayabanon mein
saf sunta hun sada yar ki ab kanon mein


parsa koi hai darwesh-o-farishta koi
main hi ek rah gaya insan sa insanon mein
dair-o-ka'ba mein to milti hai mujhe nakaami
kaamyab hota hun chahat ke sanam-khanon mein


aaj har koi meri baat pe hansta hai magar
nam kal aaega mera bhi sukhan-danon mein
tum mujhe ek nazar pyar se dekho 'saqi'
phir nai jaan si aa jaegi armanon mein