naqab ruKH se haTa dun agar ijazat ho

naqab rukh se hata dun agar ijazat ho
ye chand jag ko dikha dun agar ijazat ho
kaho to un lab-o-rukhsar ko zara chhu lun
kali kali ko hata dun agar ijazat ho


mere qarib koi jaise hur baithi hai
huzur aaina la dun agar ijazat ho
tumhaare qadmon tale kahkashan ke taron ka
zara ye farsh bichha dun agar ijazat ho


machal raha hai mere dil mein zauq-e-nazzara
yahin main tur bana dun agar ijazat ho
talab ho gar tumhein 'betab' mah-e-taban ki
faraaz-e-‘arsh jhuka dun agar ijazat ho