نقاب رخ سے ہٹا دوں اگر اجازت ہو

نقاب رخ سے ہٹا دوں اگر اجازت ہو
یہ چاند جگ کو دکھا دوں اگر اجازت ہو
کہو تو ان لب و رخسار کو ذرا چھو لوں
کلی کلی کو ہٹا دوں اگر اجازت ہو


مرے قریب کوئی جیسے حور بیٹھی ہے
حضور آئنہ لا دوں اگر اجازت ہو
تمہارے قدموں تلے کہکشاں کے تاروں کا
ذرا یہ فرش بچھا دوں اگر اجازت ہو


مچل رہا ہے مرے دل میں ذوق نظارہ
یہیں میں طور بنا دوں اگر اجازت ہو
طلب ہو گر تمہیں بیتابؔ ماہ تاباں کی
فراز عرش جھکا دوں اگر اجازت ہو