نقلی ہیں سب تالے تالی

نقلی ہیں سب تالے تالی
کیسے کریں گھر کی رکھوالی
سائل سمجھا پیسے دے گا
شیخ نے جب تسبیح نکالی


اچھے خاصے صحن میں میرے
بارش نے بنوا دی نالی
چونچ میں پہلا تنکا لے کر
چڑیا ناچی ڈالی ڈالی


کچھ دن سے چپ چپ رہتے ہیں
اس کے حاتم میرے سوالی
اس کی گلی کی پہلی دکاں پر
ہو گئیں ساری جیبیں خالی


میں ہی اپنے پاؤں تراشوں
تم نے تو زنجیر نہ ڈالی
پھر میں نے لفظوں سے بنائے
جھومر کنگن بوندے بالی