nargha-e-zulmat-e-shab se main sahar ban ke uTha

nargha-e-zulmat-e-shab se main sahar ban ke utha
ahl-e-ghaflat ke liye taza khabar ban ke utha
ye bhi ek turfa-tamasha hai teri mahfil mein
jab bhi main baitha hun aashob-e-nazar ban ke utha


jo meri jaan ka dushman tha hua hai yun bhi
sakht mushkil mein wahi meri sipar ban ke utha
arz-e-takhliq thi sunsan tabhi koi khayal
ek bagula sa sar-e-rahguzar ban ke utha


phir kisi yaad se biphri hain lahu ki maujen
phir koi dard sa sine mein bhanwar ban ke utha
teri bakhshish ke bhi andaz nirale hain bahut
koi diwana koi ahl-e-nazar ban ke utha