نشہ کچھ ایسا تھا کہ سمجھ میں نہ آئی بات

نشہ کچھ ایسا تھا کہ سمجھ میں نہ آئی بات
جب ایک روز بزم میں اس نے اٹھائی بات
یہ کائنات ورنہ کبھی کی تمام تھی
دو چار لوگ تھے کہ جنہوں نے بنائی بات


اک بات تھی جو میں نے کہی تھی بہ صد نیاز
لیکن یہ میری بات میں کس نے ملائی بات
دنیا جہاں کا ذکر کیا رات بھر مگر
اک دوسرے سے دونوں نے دل کی چھپائی بات


یہ سارا باغ اس کے رویے سے تنگ ہے
اس گل ہی نے بڑھائی ہے جب بھی بڑھائی بات
میں نے کہا زیادہ ہے مجھ کو دماغ کچھ
اس نے چمن میں جا کے صبا سے لگائی بات


چاہے جمالؔ دوسرے ہی کی زمین ہو
ہم نے تو جب سنائی ہے اپنی سنائی بات