نیا نظارہ بھی دیکھا ہوا دکھاتا ہے

نیا نظارہ بھی دیکھا ہوا دکھاتا ہے
تمہارا ساتھ بھی کیا معجزہ دکھاتا ہے
کسی سے اپنے تعلق کو جانچنا پڑ جائے
تو دیکھنا وہ تمہیں خواب کیا دکھاتا ہے


وہ مجھ سے دور مرے ساتھ چلتا ہے جیسے
وہ اک ستارہ ہے اور راستہ دکھاتا ہے
گزرتے وقت کو اک مائکروسکوپ سمجھ
جو قربتوں میں چھپا فاصلہ دکھاتا ہے


کہا معاف کہ جنگل گھنا ہے اور مرے چاند
یہاں پہ تجھ سے زیادہ دیا دکھاتا ہے
گھڑی سے تیز ہے شاید یہ آئنہ حارثؔ
کہ پیچھے والوں کو آگے کھڑا دکھاتا ہے