نظر جلوؤں میں بھر جائے تو اچھا

نظر جلوؤں میں بھر جائے تو اچھا
مقدر کام کر جائے تو اچھا
کسی سیرت پہ مر جائے تو اچھا
نہ صورت پر بشر جائے تو اچھا


نہ گردن پر رہے احساں کسی کا
طلب کی بھوک مر جائے تو اچھا
تمنا کی فسوں کاری کا طوفاں
نگاہوں سے اتر جائے تو اچھا


شراب عشق سے اے جان عالم
ہر اک پیمانہ بھر جائے تو اچھا
یہ ظاہر ہے کہ دل جائے گا جائے
انوکھی بات پر جائے تو اچھا


کوئی اللہ کا بندہ نوازے
مجھے بیگانہ کر جائے تو اچھا
گزاری عمر اکثر شادؔ رہ کر
چلو یوںہی گزر جائے تو اچھا