nazar ko bhae jo manzar pahan ke nikla hai
dhanak wo apne badan par pahan ke nikla hai

main aaina hun magar pattharon se kah dena
ek aaina hai jo patthar pahan ke nikla hai

wo apni aankh ki uryaniyat chhupane ko
haya ki aankh pe chadar pahan ke nikla hai

chhupa ke rakhta to tu bhi hawas se bach jata
magar tu husn ka zewar pahan ke nikla hai

zamana us ko kabhi bhi dara nahin sakta
khuda ka khauf jo dil par pahan ke nikla hai

kulah sar pe nahin munsif-e-zamana ke
wo apne sar pe mera sar pahan ke nikla hai