nazar se qaid-e-tayyun uthai jati hai
tajalli-e-rukh-e-jaanan dikhai jati hai

jab un ko hausla-e-dil pe e'tibar nahin
to phir nazar se nazar kyun milai jati hai

khum-o-subu ki zarurat ke hum nahin qail
sharab mast nazar se pilai jati hai

sitam-nawazi-e-paiham hai ishq ki fitrat
fuzul husn pe tohmat lagai jati hai

bhula diya hai gham-e-rozgar ne jis ko
wo dastan mujhe phir yaad aai jati hai

'shakil' duri-e-manzil se na-umid na ho
ab aai jati hai manzil ab aai jati hai