nisar dil bhi kiya aur har khushi de di
lo aaj hum ne tumhein apni zindagi de di

ye kya kiya ki nazar se nazar mili bhi na thi
qarar lut liya dil ko be-kali de di

hamare husn-e-takhyyul ka ehtiram karo
tumhaare azm ke phulon ko tazgi de di

jala ke dil ke nasheman ko apne hathon se
tumhaare shauq ke jazbon ko raushni de di

ye soch kar ki guzar jaenge ye din apne
ghamon ko bant liya apni har khushi de di

'bahaar' lut liya kis ne qafila dil ka
ye kis ne zulm ke hathon mein rahbari de di