یہ تو اب طے ہے کہ وہ لوٹ کے آنے سے رہا

یہ تو اب طے ہے کہ وہ لوٹ کے آنے سے رہا
میں بھی تصویر کوئی اور بنانے سے رہا
میں جہاں ہوں وہ اندھیروں کا گھنا جنگل ہے
میرا سایا بھی مجھے ڈھونڈ کے لانے سے رہا


تاج اس دور میں ممکن ہے کہ بن بھی جائے
کوئی فنکار مگر ہاتھ کٹانے سے رہا
غم تو ہر حال میں آنکھوں سے چھلک جائے گا
لاش سینہ میں سمندر بھی چھپانے سے رہا


روٹھنا ہے تو بڑے شوق سے تو روٹھ مگر
زندگی میں تجھے اس بار منانے سے رہا