pa-ba-zanjir hain bebak sadaen kaisi

pa-ba-zanjir hain bebak sadaen kaisi
qaid hain shahr-e-tamanna mein hawaen kaisi
hum ne chehre to naqabon mein chhupa rakkhe the
aainon mein nazar aati hain balaen kaisi


har taraf apna hi chehra nazar aata hai mujhe
odh lin meri nigahon ne dishaen kaisi
sans lije to kaman zakhm ki tan jati hai
sirf jine ka qusur aur sazaen kaisi


dewta phir se bilote hain samundar shayad
warna dharti pe har ek samt wabaen kaisi
pas pahunche to wahi sifr alif ke upar
dur se thin yahi khush-rang qabaen kaisi


hath se hath na jata rahe gumrahi ka
kya pata aap nai rah bataen kaisi
koi gardan-zadani ho to hazaron hile
bakhshna hi koi chahe to khataen kaisi


tursh ghazlen bhi 'muzaffar' ki maza deti hain
mere bare mein ye chalti hui raen kaisi