پہلے تو خاکدان بنانے کا دکھ ہوا

پہلے تو خاکدان بنانے کا دکھ ہوا
پھر آسمان کو مرے جانے کا دکھ ہوا
رویا ہوں ایک ہستیٔ نادیدہ کے حضور
مٹی میں آنسوؤں کو ملانے کا دکھ ہوا


لوگوں کو بھی ملال ہوا میرے حال پر
مجھ کو بھی داستان سنانے کا دکھ ہوا
صحرا بہت نڈھال مری تشنگی سے تھا
دریا کو میری پیاس مٹانے کا دکھ ہوا


پتھر سے آرزوئے وفا شیشہ گر کو ہے
یہ دکھ تو سارے آئنہ خانے کا دکھ ہوا
تیرے وفا پرستوں میں کچھ وہ بھی ہیں جنہیں
دنیا سے تیرے ہاتھ ملانے کا دکھ ہوا