pahle ye ana taq pe dharna hi paDegi

pahle ye ana taq pe dharna hi padegi
tab ja ke kahin hum ko faqiri ye milegi
dadi ne mere samne ek roz kaha tha
ye aaj ki ‘aurat hai ye na-haq na dabegi


dete hain jahan ped parindon ko ishaara
sayyaad ki aisi jagah hargiz na chalegi
shiddat ki hai khwahish ki mile aab-e-hayat aaj
hai 'umr ko ma'lum ki ek roz dhalegi


aane lagi hain ab to madine se sadaen
ai zindagi ab tujh se meri khub jamegi
saya hai mere sar pe buzurgon ka hamesha
ai waqt mere samne teri na chalegi