phir bapa shahr mein afraatafari kar jae

phir bapa shahr mein afraatafari kar jae
koi ye sukhi hui dar hari kar jae
jab bhi iqrar ki kuchh raushaniyan jam' karun
meri tardid meri be-basari kar jae


madan-e-shab se nikale zar-e-khushbu aa kar
aae ye mo'jiza baad-e-sahari kar jae
kasraten aaen nazar zat ki yaktai mein
ye tamasha kabhi aashufta-sari kar jae


lamha munsif bhi hai mujrim bhi hai majburi ka
faeda shak ka mujhe de ke bari kar jae
us ka mear hi kya roz badal jata hai
chhodiye! wo jo agar na-qadari kar jae