raat aati hai to bazar se lag jate hain

raat aati hai to bazar se lag jate hain
dard hi dard ke ambar se lag jate hain
chalte hi rahte hain hum par to qaza ke nashtar
hum bhi rote hue diwar se lag jate hain


aise tanhai rag-e-jaan se lipat kar roe
jaise khalwat mein gale yar se lag jate hain
'alam-e-shauq kinaron ki kise fursat hai
ye safine kabhi manjhdar se lag jate hain


zindagi tu bhi tamashe ke siwa kuchh bhi nahin
dekhte dekhte aazar se lag jate hain
chandni raat mein baithe hue tanha 'barham'
gum-shuda yaadon ke darbar se lag jate hain