raaten guzarne ko teri rahguzar ke sath

raaten guzarne ko teri rahguzar ke sath
ghar se nikal pada hun main diwar-o-dar ke sath
dastak ne aisa hashr uthaya ki der tak
larzan raha hai jism bhi zanjir dar ke sath


kashkol thamte hain kaf-e-eatibar se
karte hain hum gadagari lekin hunar ke sath
ab kis tarah ye tokari sar pe uthaun main
suraj pada hua hai mere baam-o-dar ke sath


suraj usi tarah hai ye mahtab usi tarah
dhalte rahe hain yar hi sham-o-sahar ke sath
yun hai meri udan pe bhaari mera wajud
jaise zamin bandhi ho mere baal-o-par ke sath


'tabish' mujhe safar ki riwayat ka pas tha
so main bhi rah bana ke chala rahguzar ke sath