rah-e-safar mein gard kabhi hai kabhi nahin

rah-e-safar mein gard kabhi hai kabhi nahin
dil mubtala-e-dard kabhi hai kabhi nahin
hairan kiye hain khalq ko jadu ki bastiyan
nam-o-nishan-e-fard kabhi hai kabhi nahin


khun ki safediyon ka nazara hai mustaqil
zor-e-hawa-e-sard kabhi hai kabhi nahin
ye kaise hadsat ki surat hai shahar mein
chehron ka rang zard kabhi hai kabhi nahin


nilahaton ko jis ne ghazabnak kar diya
wo sang-e-lajward kabhi hai kabhi nahin
'rahat' wo apni tarz badalta hai barha
lagta mujhe bhi mard kabhi hai kabhi nahin