رہی میری شاید دعا نصف سے کم

رہی میری شاید دعا نصف سے کم
ملا مجھ کو جو کچھ ملا نصف سے کم
یہ راہ محبت ہے توبہ کہ اس میں
میں گر کر اٹھا پر اٹھا نصف سے کم


تلاش ان کی اب تک رہی ہے ادھوری
وہ جن کو ملا ہے خدا نصف سے کم
نہیں کچھ برا کر سکا اس کا طوفاں
بجھی شمع جب تھی ہوا نصف سے کم


ترے روبرو لے کے آئی جو قسمت
میں لگنے لگا با خدا نصف سے کم
کچھ ایسے گزاری ترے اس جہاں میں
کہا نصف سے کم سنا نصف سے کم


محبت عبادت خماری شکایت
خیالؔ آپ کی ہر ادا نصف سے کم