raKHt rah-gir chhoD aae hain

rakht rah-gir chhod aae hain
panw zanjir chhod aae hain
qaid-khane ke ek kone mein
apni taswir chhod aae hain


khwab aankhon ke sath le aae
aur ta'bir chhod aae hain
wo bhi lahore se chali aai
hum bhi kashmir chhod aae hain


khar ki rah-guzar mahakne ko
phul tasir chhod aae hain
yaad-e-mazi ko dil utha laya
zakhm iksir chhod aae hain


zang-alud ho gai hogi
hum jo shamshir chhod aae hain
ek chhota sa halqa-e-yaran
ya'ni jagir chhod aae hain


lakhnau chhodne ke ba'd laga
sohbat-e-'mir' chhod aae hain
jald lautega aap ka 'mehwar'
us ko tahrir chhod aae hain