رنگ برنگے نقش ابھر کر تیر رہے ہیں پانی پر

رنگ برنگے نقش ابھر کر تیر رہے ہیں پانی پر
چاند نے اپنی مہر لگا دی دریا کی پیشانی پر
تم کیا جانو تم کیا سمجھو عشق اسی کو کہتے ہیں
ہم نے اپنی عمر گزاری کیسے ایک کہانی پر


آخر میں نے خون سے اپنے وہ تصویر مکمل کی
کب تک بے بس بیٹھا رہتا رنگوں کی من مانی پر
نسلیں وحشی ہو جاتی ہیں یار حفاظت کرنے میں
خوش ہونے کی بات نہیں ہے صحرا کی سلطانی پر


کب تک کھنڈر اپنی کہانی ہمیں سنائے گا نادرؔ
کب تک آنکھیں جمی رہیں گی دیکھیں اس ویرانی پر