rang kahte hain kahani meri
kis ki khushbu thi jawani meri

koi pae to mujhe kya pae
khoe rahna hai nishani meri

koh se dasht mein le aai hai
dushman-e-jaan hai rawani meri

khil rahi hai pas-e-diwar zaman
khwahish-e-naql-e-makani meri

sar-e-marqad hain sabhi saya-kusha
koi hasrat nahin fani meri

tapish-e-rang jhulas dalegi
kya kare sokhta-jaani meri

naqsh tha main bhi gali takhti ka
ud gai khak-e-maani meri

kya sukhan-fahm nazar thi jis ne
baat koi bhi na mani meri

naqidon ne mujhe parkha 'khalid'
khak sahraon ne chhani meri