rang-o-KHayal jo bhi hai sara liye hue

rang-o-khayal jo bhi hai sara liye hue
apni ghazal hai pyar ka lahja liye hue
un ka bhi samna to qayamat se kam nahin
aae hain wo hisab ka parcha liye hue


qismat mein zindagi thi faqat aur kuchh nahin
dariya wo par kar gaya tinka liye hue
us ke nasab pe jis ko bhi shak ho wo dekh le
aaya hai apne sath wo shajra liye hue


shams-o-qamar sitare jahan-bhar ki raunaqen
mahfil mein aa gaya hai wo kya kya liye hue
wo intizar karta raha aur so gaya
aankhon mein teri did ka sapna liye hue


'tariq' chalo chalen kabhi un ke dayar mein
kab tak yahan phiroge tamanna liye hue