rasai kaisi ki harakat hi sath chhod gai
ye kohsar si qamat hi sath chhod gai

bhanwar ke sath ulajhti hui sada ko suna
phir us ke baad samaat hi sath chhod gai

kisi se apna taaruf karaen to kaise
ki ab to apni shabahat hi sath chhod gai

tum ek shakhs bichhadne ke dukh mein baithe ho
yahan to puri jamaat hi sath chhod gai

wo jis ke waste taj di thin bastiyan 'akash'
wo regzar ki hiddat hi sath chhod gai