rishta-e-dam se jaan hai tan mein
manke manke se tere simran mein

dida-e-dil se dekhta hun tujhe
sochta hun jab apne main man mein

gul hai shabnam se aah dida-e-tar
bin wo gul-ru ke subh-e-gulshan mein

karbala ke bagule sare kash
khak udata hua phirun ban mein

gauhar-e-ab-dar ke manind
ashk ghaltan hain mere daman mein

sarw-e-gulzar sa suhata hai
wo mera yar ghar ke aangan mein

apni surat ko ai shahansha-e-husn
'ishq' ke dekh dil ke darpan mein