ru-e-zeba ke parastar nahin ho sakte

ru-e-zeba ke parastar nahin ho sakte
jo mohabbat mein giraftar nahin ho sakte
tu jo chahe to hamein dar-o-rasan tak le chal
hum magar itne gunahgar nahin ho sakte


khud-parasti ho rag-o-pai mein sarayat jin ke
qaum-o-millat ke wo me'mar nahin ho sakte
kuchh na kuchh un mein bhi khuddari ke jazbe honge
mere dushman pas-e-diwar nahin ho sakte


muskuraate hue har zulm tera sah lenge
hum magar desh ke ghaddar nahin ho sakte
ye alag baat tumhein chah rahe hain phir bhi
hum teri shab ke kharidar nahin ho sakte


khud jo karte nahin aslaf ki 'izzat 'nazir'
wo kabhi sahib-e-kirdar nahin ho sakte