ruh hazir hai mere yar koi masti ho
halqa-e-raqs hai tayyar koi masti ho

mujh ko mitti ke piyale mein pila taza sharab
jism hone laga be-kar koi masti ho

chaar samton ne tere hijr ke ghunghru bandhe
aur hum log bhi hain chaar koi masti ho

main man-o-tu ke sahifon ki tilawat karunga
be-wazu hun meri sarkar koi masti ho

koi waiz na wazifa ki koi saum-o-salat
jaan chhute meri ek bar koi masti ho

tere ehsas ki shiddat se bhara baitha hun
ab na inkar na iqrar koi masti ho

be-niyazana rahega teri duniya mein faqir
khwab-o-khwahish nahin darkar koi masti ho