saat-e-yak-nafas bhi bhaari hai

sa'at-e-yak-nafas bhi bhaari hai
aisi kuchh kaifiyat hamari hai
ek khalish hai jo kam nahin hoti
ek chubhan hai jo dil mein jari hai


kis ko samjhaen kaise samjhaen
kyon tabi'at mein sogwari hai
parda-e-ashk-hae larzan par
jo bhi taswir hai tumhaari hai


ruh mein ghul gaya hai sannata
aur dil par sukut tari hai
aate aate hi aaega aaram
zakhm gahra hai chot kari hai


lamha lamha masafat-e-shab ka
hum ko ek ek sadi pe bhaari hai
khushk aankhon mein jhank kar dekho
dil mein matam hanuz jari hai


jab se us ne 'adam kiya aabaad
suni har anjuman hamari hai
lazzaten shab ki us ke sath gain
ab faqat rasm-e-shab-guzari hai


ab to mafhum-e-zindagi 'basit'
ashk-rezi hai ashk-bari hai