sab kahin pichhe chhut-chhat gae
wo zamane wo that-bat gae

kaun tolega tujh ko phulon mein
wo taraazu gai wo bat gae

hum se achchhe rahe hamare buzurg
zindagi sadgi se kat gae

ab raha kya hai in kitabon mein
kaam ki baaten log chat gae

phir kahin bhi ye ji laga hi nahin
hum to jaane ko ghat ghat gae

pyas apni bujha ke pagal log
sab kuen raste ke pat gae

jaane kis ke hisab mein 'alam'
raaten bojhal to din sapat gae