safar mein mushkilen aaen to jurat aur baDhti hai

safar mein mushkilen aaen to jurat aur badhti hai
koi jab rasta roke to himmat aur badhti hai
bujhane ko hawa ke sath gar barish bhi aa jae
charagh-e-be-haqiqat ki haqiqat aur badhti hai


meri kamzoriyon par jab koi tanqid karta hai
wo dushman kyun na ho us se mohabbat aur badhti hai
zarurat mein azizon ki agar kuchh kaam aa jao
raqam bhi dub jati hai adawat aur badhti hai


agar bikne pe aa jao to ghat jate hain dam aksar
na bikne ka irada ho to qimat aur badhti hai