sahaara chahiye koi bashar ko
badha dije zara dard-e-jigar ko

khata-e-did hai taslim lekin
main aakhir kya karun apni nazar ko

hamari to shab-e-gham hai musalsal
sahar hum ne nahin samjha sahar ko

main har parde mein tujh ko dekh lunga
wafa ne raushni di hai nazar ko

main kin nazron se tum ko dekhta hun
zara pahchan lo meri nazar ko

tumhaare baad wo tanhaiyan hain
mujhe ghar aur main takta hun ghar ko

ye mahfil raushni-e-shama tak hai
na hoga koi parwana sahar ko

bahut hai ek jhalak jalwe ki 'mazhar'
sahaara chahiye zauq-e-nazar ko