sahaare un ke jab hasil nahin hain

sahaare un ke jab hasil nahin hain
to jine ke maze kaamil nahin hain
nigahen kaam kar jati hain dil ka
khuda shahid ki wo qatil nahin hain


na sham-e-gham na subh-e-zindagani
yahi dilchaspiyan hasil nahin hain
jinhen ehsas-e-khuddari hai ai dost
hain faqa-kash magar sail nahin hain


ye khas-o-‘am ki tafriq kaisi
hum is tafriq ke qail nahin hain
khala mein ud ke pahunche hain kuchh insan
magar is kaam mein kaamil nahin hain


chaman mein rah gae murjha ke jo phul
wo 'basir' haar ke qabil nahin hain