sahra-e-arzu mein na hargiz qiyam kar

sahra-e-arzu mein na hargiz qiyam kar
khuddari-e-junun ka bhi kuchh ehtiram kar
kaif-e-alam mein dub khudi ko dawam kar
nazm-e-gham-e-hayat ka yun ikhtitam kar


khud ko asir-e-panja-e-sad-ehtimam kar
mansub sarguzasht-e-wafa un ke nam kar
rang-e-shab-e-daraaz badal ashk-e-khun se
shayan-e-shan subh-e-tarab ehtimam kar


mana ki talkhiyon ke siwa is mein kuchh nahin
saqi se hai khulus to tauqir-e-jam kar
ab jazba-e-kalim zaruri nahin to phir
be-qaid-e-tur tu bhi tajalli ko 'am kar


ye chashm nam hai dil ki tabahi pe kis liye
'basit' usul-e-gham ko na mahfil mein 'am kar