sahra lage kabhi kabhi dariya dikhai de

sahra lage kabhi kabhi dariya dikhai de
hairan hun main kya hai jahan kya dikhai de
aawaz koi ho main usi ki sada sunun
har-samt mujh ko ek hi chehra dikhai de


nadaniyon ka dil ki bhi koi ilaj ho
ban ke wo ghair bhi mujhe apna dikhai de
mujh ko to anjuman hi laga apni zat mein
ek shakhs dusron ko jo tanha dikhai de


kis ka yaqin kijiye kis ka na kijiye
har chaaragar mujhe to lutera dikhai de
'jawed' apni apni basirat ki baat hai
sab din kahin mujhe to andhera dikhai de