sair-e-gulshan se jo fursat ho idhar bhi dekho

sair-e-gulshan se jo fursat ho idhar bhi dekho
rang-e-gul dekh chuke dagh-e-jigar bhi dekho
meri mayyat pe use khak-basar bhi dekho
zindagi-bhar ki riyazat ka samar bhi dekho


nuqta-e-husn ba-andaz-e-digar bhi dekho
ishq ka zawiya-e-husn-e-nazar bhi dekho
ek hi husn ke jalwe nazar aaenge tamam
aaina-khana-e-duniya mein jidhar bhi dekho


hasrat-o-yas-o-gham-o-ranj hain mehman dil mein
kitna aabaad hai allah ka ghar bhi dekho
bikhri sindur bhari zulfon mein ru-e-raushan
surkhi-e-sham mein unwan-e-sahar bhi dekho


marte marte na hate rah-e-mohabbat se qadam
mujh mein sau aib sahi ek hunar bhi dekho
farq karte nahin 'shoala' khazaf-o-gauhar mein
ye sitam-zarfi-e-arbab-e-nazar bhi dekho