shahr-e-na-pursan mein kuchh apna pata milta nahin

shahr-e-na-pursan mein kuchh apna pata milta nahin
baam-o-dar raushan hain lekin rasta milta nahin
fasl-e-gul aisi ki arzan ho gae kaghaz ke phul
ab koi gul-pairahan zarrin-qaba milta nahin


aashna chehron se rang-e-ashnai ud gaya
ham-zaban ab khushk patton ke siwa milta nahin
ek sannata hai shabnam se shua-e-nur tak
ab koi aanchal pas-e-mauj-e-saba milta nahin


hakimon ne shahr ke andar fasilen khinch din
din mein bhi ab koi darwaza khula milta nahin
itne be-parwa irade itne be-taufiq gham
hath uthte hain magar harf-e-dua milta nahin