shahr to milte hain aabaad kahan milte hain

shahr to milte hain aabaad kahan milte hain
log galiyon mein bhi aazad kahan milte hain
ai mere 'ishq ke ustad khuda bakhshe tujhe
is hunar ke bhi ab ustad kahan milte hain


koi shirin kisi bazar mein ye kahti thi
sar kahan phatte hain farhad kahan milte hain
'umr-bhar sath nibhane ka jo dam bharte hain
wo bhi do chaar dinon ba'd kahan milte hain


hum ne nashad zamane se mohabbat sikhi
ab sabhi shad hain nashad kahan milte hain
bas lakiren si kitabon mein nazar aati hain
lafz kab milte hain aa'dad kahan milte hain