sham hai shor hai lashkari mujhko ghere hain is shahr mein

sham hai shor hai lashkari mujh ko ghere hain is shahr mein
aur main sochta hun ki sab log mere hain is shahr mein
sehn-e-alam mein ek durbin se ulajhta hun main raat bhar
kahkashaen hain ya jugnuon ke basere hain is shahr mein


din ki unchi fasilon ne pahle to suraj ko andha kiya
aur ab raat ka waqt hai bas andhere hain is shahr mein
koh-e-afsurdagi shahr-e-jaan tere daman mein aabaad hai
kuchh parindon ke aur kuchh faqiron ke dere hain is shahr mein


bhairwin ke suron mein bhajan gungunate hue sham ne
aasman ki rida par sitare bikhere hain is shahr mein
ek tilai chamak se bana hai ye duniya ka jadu-nagar
ek pari-zad ke 'ashiqon ke basere hain is shahr mein


rang raqsan hain aur kuchh basanti patangen hain lahore ki
kya dhanak mu-qalam ek musawwir ne phere hain is shahr mein