shiddat bala ki hoti hai jis waqt pyas mein

shiddat bala ki hoti hai jis waqt pyas mein
dariya dikhai deta hai khali gilas mein
wo chiz dhundne se bhi milti hai phir kahan
jo chiz khoi jati hai hosh-o-hawas mein


un raston se hum ko guzara fareb ne
kante chhupe hue the jahan narm ghas mein
bekar kar rahe hain shikayat nasib se
resham ke kide palne wale kapas mein


hum ne qalam ki nok chala kar dimagh par
tanke hain bel bute ghazal ke libas mein
ai 'chand' meri samt abhi apna rukh na kar
is waqt koi aur hai mere qayas mein