shikwa-e-gham ka asar yaad aaya

shikwa-e-gham ka asar yaad aaya
husn-e-mahjub-e-nazar yaad aaya
ashk-e-khunab-asar yaad aaya
lakht-e-dil lakht-e-jigar yaad aaya


panw ka hosh na sar yaad aaya
tera kucha tera dar yaad aaya
hamdam-e-rah safar yaad aaya
saya-e-barg-e-shajar yaad aaya


jab bhi dekhi hai badalti duniya
un ka andaz-e-nazar yaad aaya
hichkiyan phir lagin aane ruk kar
phir koi bar-e-digar yaad aaya


qasr-e-shahi mein sukun kya milta
apna ujda hua ghar yaad aaya
hum ne khai thi jahan par thokar
phir wahi rahguzar yaad aaya


rukh ki saugand hai zulfon ki qasam
tu mujhe sham-o-sahar yaad aaya
haram-o-dair ka chakkar chhoda
hum ko jab aap ka dar yaad aaya


kyon 'mubarak' na ho manzil aasan
ham-safar waqt-e-safar yaad aaya