sidha chalne mein dushwari hoti hai

sidha chalne mein dushwari hoti hai
khali jeb bhi kitni bhaari hoti hai
mujhe bataya bagh mein baad-e-sarsar ne
sahra mein bhi baad-e-bahaari hoti hai


main wahshat mein phul masalne lagta hun
mujh par jab wo khushbu tari hoti hai
mujh ko aap aza-khana kah sakte hain
jitni mujh mein girya-o-zari hoti hai


sab se pahle wahi nishana bante hain
jin hirnon ki aankh shikari hoti hai
ye misra to mila hai mujh ko wirse mein
sab se badi daulat khuddari hoti hai


diwana 'arman' main un ko manta hun
jin ki sanad sahra se jari hoti hai