sina figar chaak jigar kuchh na puchhiye

sina figar chaak jigar kuchh na puchhiye
uftad-ha-e-sham-o-sahar kuchh na puchhiye
kyunkar hui hai zist basar kuchh na pochhiye
kyunkar kate hain sham-o-sahar kuchh na puchhiye


katne ko yun to kat hi gai umr-e-gham magar
kitna tawil tha ye safar kuchh na puchhiye
phir aalam-e-khayal mein aae wo be-naqab
kyon aah mein hua hai asar kuchh na puchhiye


hum kab se jal rahe hain tamanna mein aap ki
misl-e-charagh-e-rahguzar kuchh na puchhiye
hosh-o-hawas kho gai wo chashm-e-awwalin
anjam-e-jalwa-ha-e-digar kuchh na puchhiye


sehn-e-chaman mein aai ye kaisi bahaar-e-gul
kyon nala-zan hain barg-o-shajar kuchh na puchhiye
kyon badh ke le liye mere manzil ne khud qadam
jab bhi kiya hai azm-e-safar kuchh na puchhiye


'nayyar' kisi ne rukh se jo ulta zara naqab
kyon bujh gaya charagh-e-sahar kuchh na puchhiye