sohbat hai tere khayal ke sath
hai hijr ki shab visal ke sath

ai sarw-e-rawan tuk ek idhar dekh
ji jate hain teri chaal ke sath

hai tegh o kaman ki si nisbat
abru ko tere hilal ke sath

mat zulf ko shana kar mera ji
wabasta hai baal baal ke sath

dil apna hanuz sadgi se
pechida hai zulf o khal ke sath

mehman tha kis ka tu shab ai mah
aata hai jo is malal ke sath

rukhsaron ne kuchh araq kiya hai
kuchh chashm hai infial ke sath

main sher hun besha-e-sukhan ka
sohbat hai sag o shaghaal ke sath

iksir hai 'mushafi' ka milna
yani ki wo hai kamal ke sath