سکوت عشق میں ڈوبا ہوا وہ اک لڑکا

سکوت عشق میں ڈوبا ہوا وہ اک لڑکا
چراغ ہجر جلاتا ہوا وہ اک لڑکا
پتہ کرو اسے صحرا میں کون لے آیا
ہر اک بات پہ ہنستا ہوا وہ اک لڑکا


ضرورتوں کے تقاضوں میں ٹوٹتا بنتا
بہت قریب سے دیکھا ہوا وہ اک لڑکا
نہ جانے کون سی دنیا میں کھو گیا آخر
تری گلی سے گزرتا ہوا وہ اک لڑکا


محبتوں کے حسیں خواب لے کے آنکھوں میں
بشیر بدرؔ کو پڑھتا ہوا وہ اک لڑکا
قلم لبوں میں دبائے ہوئے وہ اک لڑکی
اسی کا عکس بناتا ہوا وہ اک لڑکا


تلاش کیجئے نادرؔ پرانے البم میں
کسی کی چاہ میں بھٹکا ہوا وہ اک لڑکا