sunta hai mere ham-nashin kahti hai ye bahaar kya

sunta hai mere ham-nashin kahti hai ye bahaar kya
phulon se dosti na kar phulon ka e'tibar kya
bazi-e-dil ki mat par badh gae aur hausle
husn ki jit jit kya ishq ki haar haar kya


husn pe naz kijiye aap magar na bhuliye
husn to chadhti dhup hai dhup ka e'tibar kya
de ke chaman ko apna khun mangta kab hun khun-baha
main hun bahaar ke liye mere liye bahaar kya


lazzat-e-intizar mein kho gae hum to ai 'nadim'
apna bhi intizar hai un ka hi intizar kya
dil mein hai anwar aaj bhi aatish-e-gham se raushni
milti hai is maqam par sarhad-e-nur-o-nar kya