tahayyuraat ka aaina teri kam-suKHani

tahayyuraat ka aaina teri kam-sukhani
padi hain mujh ko musalsal jo aafaten sahni
pasina khun thakan aable shakebai
'ajib chiz hai yaro mazaq-e-kohkani


buton ko todna sadiyon se jin ka iman tha
shi'ar ban gaya un ka mazaq-e-dil-shikani
hasin jism hain show-case mein sajae hue
kharida jata hai arzan waqar-e-gul-badani


'ajib shor tha zagh-o-zaghan ki mahfil mein
sada-e-tair-e-shirin nahin kisi ne suni
har ek samt se baunon ne sangsar kiya
buland-qamati mere liye 'azab bani