تعلقات کی یہ روشنی ہے کتنی دیر

تعلقات کی یہ روشنی ہے کتنی دیر
ترے لبوں پہ مری شاعری ہے کتنی دیر
وہی ملال کا سورج وہی گلی کوچہ
اے خواب یار تری زندگی ہے کتنی دیر


تجھے بھی خواہشیں تیری تباہ کر دیں گی
اے حسن یار تری سادگی ہے کتنی دیر
بجھے پڑے ہیں ترے شہر میں کئی سورج
میں جانتا ہوں یہ زندہ دلی ہے کتنی دیر


ترے خطوں پہ نظر پڑتی ہے تو سوچتا ہوں
مری نگاہ میں یہ روشنی ہے کتنی دیر
اب اس کے بعد وہی دشت ہے وہی صحرا
تمہاری آنکھ میں نادرؔ نمی ہے کتنی دیر